हमरा नहि सोहाय यै

ई अंटेटल के टाट, हमरा नहि सोहाय यै,
बीच अंगना दऽ बाट, हमरा नहि सोहाय यै।
मौगी लबड़ी नीको भली,
मरद लबड़ा के बात हमरा नहि सोहाय यै।

केकरो ओल सनक बोल, हमरा नहि सोहाय यै,
घरक फुटल ढोल, हमरा नहि सोहाय यै।
कुमारे रही से बरु नीक,
कनियाँ भकलोल हमरा नहि सोहाय यै।

बिन मेघक मल्हार हमरा नहि सोहाय यै,
छुछक दुलार हमरा नहि सोहाय यै,
भोजन व्यवस्था हो, तँ कोनो बात नहि,
झूठौ के हकार हमरा नहि सोहाय यै।

- (सितम्बर २००४) इंद्र कान्त लाल