जो रे जमाना तहिया के
मोटर चलय बिन पहिया के...
हाकिम सब पर हुकूम चलै छल,
के पुछय सिपहिया के,
जो रे जमाना तहिया के।
डाक चलै छल चहुँ दिस हमरे,
सिकियो धरि नहि हिल सकै यै,
बिना चढ़ाबा हमरा चढ़ौने
मूसो नहि बिल खूनि सकै यै,
फिल्मी तारिका घेर नचाबी
हम वंशज किशुन कन्हैया के,
जो रे जमाना तहिया के।
छल सऽ बल सऽ वा कौशल सऽ
सत्ता के हथियौने छी,
बड़का-बड़का हस्ती के हम
अंगुरी पर नचौने छी,
जेलो में हमर सेज सजै छल
सबटा खले बतहिया के,
जो रे जमाना तहिया के।
बिरादरी में एहि बेर हमरा
सभ कियो धऽ के पछाड़ि देलक यै,
हमरे पोसल पट्ठा सभ
हमरे आबि के बजाड़ि देलक यै,
तेलो सभटा चुबि गेल छै
लालटेन फुटलहिया के,
जो रे जमाना तहिया के।
-इंद्र कान्त लाल (नवम्बर १९९९)
Subscribe to:
Post Comments (Atom)
1 comment:
अति उत्तम ईन्द्रकान्तजी,कविता लिखवा मे अहाँ कड मासटरि अछि. हमर शुभकामना!!!.
"जय मिथिला"
ज्योति प्रकाश लाल "नारायनजी"
Post a Comment